Bir neçə gün Ankarada - Beynəlxalq Çubuk simpoziumunda (8-11 oktyabr, 2015)

Şəki Türk dünyasının paytaxtı ola bilər

Tədbir əslində sentyabr ayı üçün planlaşdırılmışdı və festifal olaraq keçirilməli idi. Lakin Türkiyədə sabitliyin pozulması səbəbindən 1 ay gecikdi və simpozium kimi keçirildi. Tədbirin təşkilatçıları Çubuk bələdiyyəsi və İldırım Bəyazid Universiteti idi.

Məndən başqa, Türkiyə xaricindən Qazaxıstandan fəlsəfə elmləri doktoru Baxıtjan Saterşinov və şair Kadırbek Kunıpiaoğlu, Qırğızıstandan isə xalq yazıçısı Melis Abakirov simpoziuma qatılmışdır. Hələ simoziumun başlamasına qədər, 8 oktyabrda,  Beynəlxalq Türk Mədəniyyəti Təşkilatının (TürKSOY-un) baş katibi professor Düsen Kaseinov dördümüzü də təşkilatın Ankaradakı iqamətgahına dəvət etdi. İsti söhbət əsnasında mənə məlumat verildi ki, təşkilatın noyabrda keçiriləcək yığıncağında Şəki şəhərinin Türk dünyasının mədəni paytaxtı elan edilməsi məsələsinə baxılacaqdır. Şəkinin rəqibi Ufadır. Başqa sözlə, ya Ufa, ya da Şəki şəhəri türk dünyasının mədəni paytaxtı olmalıdır. Amma Şəkinin paytaxt olma şansı daha çoxdur...